மாநில சிறப்பு பொதுக்குழு கூட்டம் 09.01.21

மாநில சிறப்பு பொதுக்குழு கூட்டம் 09.01.21

கொரோனா தொற்று காரணமாக நடத்தப்படாமல் இருந்த தமிழ்நாடு வன அலுவலர்கள் சங்கத்தின் மாநில பொதுக்குழு கூட்டம் தற்போது அரசால் அனுமதிக்கப்பட்ட தளர்வுகளால் சிறப்பு பொதுக்குழு கூட்டமாக 09.01.2021 ஆம் தேதி விழுப்புரம் நகரில் நடைபெற்றது. கூட்டத்திற்கு மாநிலத்தலைவர் திரு.R.முருகேசன் அவர்கள் தலைமை வகித்து சிறப்புரையாற்றினார்.இந்த சிறப்பு பொதுக்குழு கூட்டத்திற்கு பல்வேறு மாவட்டங்களில் இருந்து மாவட்ட மற்றும் மாநில பிரதிநிதிகள் கலந்து கொண்டனர். 

திரு.R.இராஜா வனவர் அவர்கள் வரவேற்புரையும் திரு.M.பாபு வனச்சரக அலுவலர் அவரகள் நிகழ்ச்சியினை தொகுத்து வழங்கி முன்னிலையும் வகித்தார். திரு.G.அருண்ராஜ் வனவர் அவர்கள் முன்னிலை வகித்து நிகழ்ச்சியினை ஒருங்கிணைத்தார். திரு.D.விஸ்வநாதன் வனவர் அவர்களால் நன்றியுரை தெரிவிக்கப்பட்டது. 

கூட்டத்தில் பல்வேறு காலகட்டங்களில் பணியின்போது வீரமரணம் அடைந்த மற்றும் உயிர்நீத்த அனைவரின் ஆத்மா சாந்தியடைய மெளன அஞ்சலி செலுத்தப்பட்டது.

மாவட்ட நிர்வாகிகள் மற்றும் உறுப்பினர்களால் பல்வேறு கோரிக்கைகள் வைக்கப்பட்டு, குறைபாடுகள் சுட்டிக்காட்டப்பட்டது. பல்வேறு கோரிக்கைகள் மற்றும் குறைபாடுகளுக்கு எவ்வித குறைவுமின்றி தெளிவாகவும் விளக்கமாகவும் மாநிலத்தலைவர் அவர்கள் தன்னுடைய சிறப்புரையில் விளக்கவுரை வழங்கினார். சங்கத்தின் செயல்பாடுகள் பற்றியும் பல்வேறு காலகட்டங்களில் பல்வேறு கோரிக்கைகள் சங்கத்தால் முன்வைக்கப்பட்டு அரசால் அங்கீகரிக்கப்பட்டது தொடர்பாகவும் மாநிலத்தலைவர் எடுத்துரைத்தார்.  

கடந்த பல ஆண்டுகளாக வனக்காப்பாளர்களின் ஊதிய முரண்பாடு களையவேண்டும் என பலதரப்பிலிருந்தும் வைக்கப்பட்ட கோரிக்கை ஊதியக்குழுவிடம் விளக்கமாக எடுத்துரைக்கப்பட்டுள்ளது எனவும் இக்கோரிக்கை விரைவில் நிறைவேற்றப்படுவதற்கான முயற்சிகள் முழு அளவில் எடுக்கப்பட்டுள்ளதாகவும் தெரிவித்தார். 

தேர்வாணையம் மூலம் புதிதாக பணியில் சேர்ந்துள்ள அனைத்துநிலை வனச்சீருடைப்பணியாளர்களையும் வரவேற்று அவர்கள் திறம்பட செயல்பட தனது வாழ்த்துக்களை சங்கத்தின் சார்பாக தெரிவித்துக்கொண்டார். புதியவர்கள் சங்கத்தில் தங்களை உறுப்பினர்களாக இணைத்துக்கொண்டு வரும் சங்கத்தேர்தலில் கலந்துகொண்டு தங்களது பங்களிப்பை அளிக்கவேண்டும் எனவும் கேட்டுக்கொண்டார்.

பல்வேறு மாவட்டங்களில் இருந்து வந்த பிரதிநிதிகள் தங்கள் மாவட்டங்களில் உள்ள உறுப்பினர்களின் கருத்துக்களை எடுத்துக்கூறினர்.

அதன் விபரம் பின்வருமாறு

வனக்காப்பாளர் நிலையில் இருந்து வனவராக பதவி உயர்வு பெற ஊக்கமும் உதவியும் செய்ததற்கு நன்றி தெரிவிக்கப்பட்டது. மேலும் பத்தாண்டுகளுக்கும் மேலாக பதவி உயர்வு இன்றி வனக்காப்பாளராக பணிபுரிந்து வருபவர்களின் நிலையினை கருத்தில்கொண்டு 2019 - 2020 ஆண்டிற்கான வனவர் பதவி உயர்வு பெறுவதற்கான முயற்சி  மேற்கொள்ளப்படவேண்டும் என கேட்டுக்கொள்ளப்பட்டது. 

சீருடைப்பணியாளர்களுக்கு குற்றத்தாள் வழங்கப்படுவதற்கு முன் குற்றம் தொடர்பாக விசாரணை மேற்கொள்ள மாவட்ட அல்லது மண்டல அளவில் குழு அமைக்கப்பட்டு அவர்களின் விசாரணைக்குப்பின் முடிவு எடுக்கப்படவேண்டும் என தெரிவித்தனர். மலைப்படி வழங்குவதில் ஒருசில இடங்களில் குளறுபடி உள்ளதாக எடுத்துரைக்கப்பட்டது.

தொழில்நுட்ப ரீதியாக வனத்துறை மேம்பாடு அடையவில்லை என எடுத்துரைக்கப்பட்டது. குற்ற எதிரிகளை கண்டுபிடிக்க தேவையான தொழில்நுட்ப வளர்ச்சி (செல்பேசி மூலம் இருப்பிடம் போன்றவற்றை அறிதல், வாகன விபரங்களை பெறுதல்) வனத்துறையில் இல்லாததால் பிறதுறையை அணுகவேண்டி உள்ளது.

கல்வராயன் மலைப்பகுதியில் பணிபுரியும் பணியாளர்கள் மீது எடுக்கப்படும் ஒழுங்கு நடவடிக்கைகளை தவிர்க்கவேண்டும் எனவும் கல்வராயன் மலையில் பணிபுரியும் பணியாளர்கள் பல்வேறு இன்னல்களை சந்தித்து வருகின்றனர் எனவும் தெரிவிக்கப்பட்டது. கல்வராயன் மலையில் வனப்பகுதி, தனியார் நிலம் மற்றும் வருவாய்த்துறைக்கு சொந்தமான நிலம் என பாகுபாடு செய்ய இயலாத நிலை பல இடங்களில் உள்ளது. எனவே வனத்துறைக்கு சொந்தமான இடங்களை அளவீடு செய்து அவற்றை காப்புக்காடாக அறிவிக்க நடவடிக்கை எடுக்கவேண்டும் எனவும் போதுமான பணியாளர்களை பணியமர்த்தவேண்டும் எனவும் (1000 எக்டருக்கு ஒரு வனக்காப்பாளர் மற்றும் ஒரு வனக்காவலர்)  தெரிவிக்கப்பட்டது.

நிர்வாக காரணம் எனவும் பொதுநலன் கருதி எனவும் பணியிடமாறுதல் செய்வதை கைவிடவேண்டும் என வலியுறுத்தப்பட்டது. 

கோவை மாட்டத்தில் உள்ள சங்க உறுப்பினர்களுக்கு உறுப்பினர் அடையாள அட்டை வழங்கப்பட்டுள்ளது எனவும் உறுப்பினர் சந்தா ஒவ்வொரு வருடமும் பெறப்படுகிறது எனவும் காலமுறை கூட்டம் நடத்தப்பட்டு உறுப்பினர்களின் பல்வேறு கோரிக்கைகள் மாவட்ட அளவிலேயே உரிய அலுவலர்களை அணுகி களையப்படுகிறது எனவும் அம்மாவட்டத்தின் தலைவர் திரு.சிவப்பிரகாசம் அவர்கள் தெரிவித்தார். இதே போன்று அனைத்து மாவட்டங்களிலும் செயல்படவேண்டும் எனவும் கேட்டுக்கொண்டார். 

நீண்ட கால கோரிக்கைகளான சரக வாகனங்களுக்கான எரிபொருள் உயர்த்தி வழங்குதல், இருசக்கர வாகனம் வனவர் மற்றும் வனக்காப்பாளர்களுக்கு வழங்கவேண்டும் எனவும், நவீன படைக்கலன்கள் வழங்கப்படவேண்டும் எனவும் சீருடைப்பணியாளர்களுக்கு ஒருங்கிணைந்த அடுக்குமாடி குடியிருப்பு நகரப்பகுதிகளில் அமைத்து தரவேண்டும் எனவும் வலியுறுத்தப்பட்டது. 

வனத்திற்கு உள்ளேயும், வெளியேயும் எந்த வகையான மரங்களை வெட்டுவதற்கும் வனத்துறையின் அனுமதி பெறவேண்டும் என அரசு அறிவிக்கவேண்டும் என தெரிவிக்கப்பட்டது. மாநில மரமான பனைமரத்தினை பாதுகாக்க அரசு நடவடிக்கை எடுக்கவேண்டும் எனவும் தெரிவிக்கப்பட்டது. 

வீரமரணம் அடையும் சீருடைப்பணியாளரின் குடும்பத்திற்கு உடனடியாக கருணை அடிப்படையில் அரசு வேலையும் உரிய இழப்பீடும் வழங்க நடவடிக்கை எடுக்கவேண்டும் என வலியுறுத்தப்பட்டது. 

மிதிக்கப்படும் வன சீருடைப்பணியாளர்களின் உயிர்கள்

 மிதிக்கப்படும் வன சீருடைப்பணியாளர்களின் உயிர்கள்

வனத்துறை என்பது நாட்டிற்கு மட்டுமல்ல ஒட்டுமொத்த உலகத்திற்கே முதுகெலும்பு போன்றது மற்றும் முக்கியமானதும் ஆகும். தேசிய வனக்கொள்கை 1988 ஒரு நாட்டின் மொத்த பரப்பில் 33 சதவீதம் வனப்பரப்பு இருக்கவேண்டும் என கூறுகிறது. நம் தமிழ்நாட்டைப்பொருத்தவரை வனப்பரப்பு 17 சதவீதம் என்ற அளவிலும் பட்டா நிலங்களில் உள்ள மரங்களையும் கணக்கிட்டால் 21 சதவீதம் என்ற அளவிலும் உள்ளது. வனத்துறையினரின் அடிப்படை பணி என்பது வனத்தைப்பாதுகாப்பதும் மற்றும் மேலாண்மை செய்வதும் ஆகும் என வனச்சட்டங்கள் கூறுகின்றன. இப்பணியினை செய்யும் முன்களப்பணியாளர்கள் வனச்சரக அலுவலர்கள், வனவர்கள், வனக்காப்பாளர்கள், வனக்காவலர்கள் மற்றும் வேட்டைத்தடுப்பு காவலர்கள் ஆகியோர் ஆவர். இதிலும் குறிப்பாக அனுதினமும் காட்டிற்குள் செல்வது வனக்காப்பாளர்கள், வனக்காவலர்கள் மற்றும் வேட்டைத்தடுப்பு காவலர்கள் ஆவர். 

சிறிய வகையிலான செடி, கொடி, புல், பூண்டு முதல் பெரிய மற்றும் விலைமதிப்பு மிக்க தேக்கு, செம்மரம், சந்தனமரம், ஈட்டி போன்றவற்றையும் சிறிய உயிரினங்களான புழு, பூச்சி, பறவை முதற்கொண்டு பெரிய உயிரினங்களான புலி, சிறுத்தை, மான், யானை போன்றவற்றை பாதுகாக்கும் பணியினை மேற்கொள்ளும் துறை என்பதில் ஐயமில்லை.வனம் என்பது மனிதர்கள் நடமாட்டம் இல்லாத, சாலைவசதியற்ற பகுதி என்பது அனைவரும் அறிந்த ஒன்று. இவ்வாறான காட்டிற்குள் சென்று பாதுகாப்பு பணியினை மேற்கொள்ளும் வனசீருடை பணியாளர்களுக்கு பல்வேறு இன்னல்கள் உள்ளன என்பது பொதுமக்களுக்கு தெரியவில்லையென்றாலும் வனத்துறையின் அலுவலர்களுக்கு நன்றாக தெரியும்.

பாதுகாப்பு பணிகாரணமாக காட்டிற்குள் செல்லும் பணியாளர்களுக்கு எந்தவொரு அவசர தேவை எனினும் காட்டிற்குள் இருந்து உடனே தகவல் தெரிவிப்பது சற்று சிரமமானது. அதேநேரம் பொதுவாக அவசர தேவை எனினும் உடனே வாகனம் வருவதற்கும் வனத்திற்குள் வழியில்லை. இது ஒருபுறம் இருக்க தேவையான மற்றும் அத்தியாவசியமான நவீன ஆயுதங்கள் ஏதும் வனத்துறையினர் வசமில்லை. பெரும்பாலான இடங்களில் தகவல் தொழில்நுட்ப சாதனங்களில் ஒன்றான வாக்கி டாக்கி கொடுக்கப்பட்டுள்ளது. வனப்பகுதிக்குள் வனச்சீருடைப்பணியாளர்களுக்கு சமூக விரோதிகளால் அச்சுறுத்தல் உள்ளது. சமூக விரோதிகள் பல அதிநவீன ஆயுதங்களை வைத்திருக்கக்கூடும் அதே சமயம் ஒரு குழுவாகவும் இருக்கக்கூடும், இதுபோன்ற சமயங்களில் அவர்களை எதிர்கொள்வது என்பது எவ்வளவு சவாலான விஷயம் என்பதை சிந்தித்து பார்க்கவேண்டும். இது தவிர வன உயிரினங்களான யானை, புலி, கரடி, சிறுத்தை மற்றும் பாம்பு போன்றவற்றாலும் பாதிக்கக்கூடிய வாய்ப்புகள் உள்ளது. இவற்றையெல்லாம் எதிர்கொள்ள எந்தவகையான வழிமுறைகள் பின்பற்றப்படுகின்றன என்பது கேள்விக்குறியே?? 

ஊதிய உயர்வு/தேர்வு நிலை/சிறப்பு நிலை

 ஊதிய உயர்வு / தேர்வு நிலை / சிறப்பு நிலை

அரசுத்துறையில் பணிபுரியும் அரசு ஊழியர்களுக்கு ஒவ்வொரு வருடமும் பணியில் சேர்ந்த நாளை கணக்கில் கொண்டு (ஜனவரி/ஏப்ரல்/ஜூலை /அக்டோபர்) ஊதிய உயர்வு வழங்கப்படுகிறது. 

ஊதிய உயர்வு ஏற்கனவே 3 சதவீதம் என்ற நிலையில் இருந்தது. அது 7 வது ஊதியக்குழுவில்Pay Matrix - இன் ஒரு நிலையில் இருந்து அடுத்த நிலைக்கு மாற்றியமைக்கப்படவேண்டும் என குறிப்பிடப்பட்டுள்ளது. மேலும் தேர்வு நிலை/சிறப்பு நிலையில் அதாவது 10/20 வருடங்கள் முறையே பணி முடித்தவர்களுக்கு Two Increments அதாவதுPay Matrix இல் இரண்டு நிலைகள் உயர்த்தி வழங்கப்படவேண்டும் என தெரிவிக்கப்பட்டுள்ளது.

ஊதியக்குழுவின் அனைத்து விபரங்களையும் (அரசாணை) காண்பதற்கு

GO Ms No: 303 Dt 11.10.2017 Finance (Pay Cell) Department

இங்கு கிளிக் செய்யவும்

முகவரியில்லா புகார் கடிதங்கள் (மொட்டைக்கடிதங்கள்)

Anonymous/Pseudonymous Complaints 

அரசு ஊழியர்கள் மற்றும் பொதுத்துறை நிறுவனங்களில் பணிபுரியும் ஊழியர்கள் ஒருசில நேரங்களில் பலவித புகார்களுக்கு உள்ளாகின்றனர். புகாரானது எழுத்து மூலம் பெறப்படும் அல்லது பாதிக்கப்பட்ட நபர் நேரடியாக உரிய அலுவலரை அணுகி புகார் அளிக்கலாம். அதன்மீது முறையான விசாரணை மேற்கொண்டு அதற்குத்தக்கவாறு நடவடிக்கை எடுக்கப்படுகிறது. ஆனால் ஒருசில நேர்வுகளில் காழ்ப்புணர்ச்சியின் காரணமாகவும் புகார் அளிக்கும் சம்பவமும் நடைபெறுகிறது. மேலும் ஒருசிலர் தவறான முகவரி கொடுத்தும், முகவரி இல்லாமலும் (மொட்டைக்கடிதங்கள்) ஒரு அரசு ஊழியர் அல்லது பொதுத்துறை நிறுவனங்களில் பணிபுரியும் ஊழியர்கள் மீது புகார் மனுக்களை அவரது உயர் அலுவலருக்கோ அல்லது அரசுக்கோ அனுப்பிவிடும் சம்பவமும் நடைபெறுகிறது.

இதுபோன்று பெறப்படும் கடிதங்களின் மீது எடுக்கப்படவேண்டிய நடைமுறைகள் குறித்து வெளியாகியுள்ள கடிதங்கள் மற்றும் அரசாணைகளைப்பற்றி காண்போம்.

ஊழல் புகார் கூறும் மொட்டை கடிதம் மீது நடவடிக்கை கூடாது என ஊழல் கண்காணிப்பு ஆணையம் உத்தரவு என நாளிதழில் வந்த செய்தி.

பெரும்பாலும் முகவரியில்லா அல்லது தவறான முகவரியில் இருந்து அனுப்பப்படும் புகார் மனுக்கள் பெரும்பாலும் காழ்ப்புணர்ச்சியின் காரணமாகவே அனுப்பப்படுகிறது. ஒருவரை பழிவாங்கவேண்டும் அல்லது அவரது பெயருக்கு களங்கம் விளைவிக்கவேண்டும் என எண்ணும் நபர்கள் இதுபோன்ற புகார் மனுக்களை அனுப்பிவிடுகின்றனர். இதனால் அந்நபருக்கு மன உளைச்சல் ஏற்படுவதோடு மட்டுமல்லாமல் ஒழுங்காக வேலை செய்யவேண்டும் என்ற எண்ணமும் சிதறடிக்கப்படுகிறது.

தமிழக அரசு 03.03.1982 இல் அரசு ஊழியர்களின் மேல் குற்றம் சுமத்தி கையெழுத்திடாத மனுக்களோ அல்லது புனைப்பெயரில் மனுக்களோ வந்தால் எடுக்கப்படவேண்டிய நடைமுறைகள் குறித்து அனைத்து மாவட்ட ஆட்சியர் உட்பட அனைத்து துறைத்தலைவர்களுக்கும் கடிதம் அனுப்பியுள்ளது. அதன் நகல்

மத்திய ஊழல் கண்காணிப்பு ஆணையம் (Central Vigilance Commission) Circular No: 03/03/16  நாள் 07.03.2016 இல் சுற்றறிக்கை ஒன்றை வெளியிட்டுள்ளது. அதில் முகவரியில்லா மற்றும் தவறான முகவரியில் இருந்து வரும் புகார் மனுக்கள் மீது எடுக்கப்படவேண்டிய நடைமுறைகள் தொடர்பாக தெரிவிக்கப்பட்டுள்ளது. அதன் நகலை காண்பதற்கு இங்கு கிளிக் செய்யவும்

அதேபோன்று தமிழக அரசும் 19.02.2018 இல் புகார் மனுக்கள் தொடர்பாக எடுக்கப்படவேண்டிய நடவடிக்கைகள் குறித்து விரிவான அரசாணை ஒன்றை வெளியிட்டுள்ளது (GO Ms No: 173 Dated 19.02.2018 Personnel and Administrative Reforms (N) Department) அதன் நகலை காண்பதற்கு இங்கு கிளிக் செய்யவும்

மத்திய ஊழல் கண்காணிப்பு ஆணையம் 24.09.2020 இல் முகவரியில்லாத புகார் மனுக்கள் மீது நடவடிக்கை எடுப்பது தொடர்பாக சுற்றறிக்கை ஒன்றை  (Central Vigilance Commission) Circular No: 12/09/20  நாள் 24.09.2020)  வெளியிட்டுள்ளது. அதில் முகவரியில்லாத புகார் கடிதங்கள் மீது நடவடிக்கை தேவையில்லை என தெரிவித்துள்ளது.அதன் நகலை காண்பதற்கு இங்கு கிளிக் செய்யவும்